Тўлқин Эшбек: БАЪЗИ ОТАЛАРГА ПАНДНОМА

Ўғлингизга “ўқи!” деманг,
гар ўқишин истасангиз.
Айтган ишни қилмай қўяр,
агар, “қил” деб қистасангиз…
Сиз танлаган касбга хумпар,
Меҳр қўймас ҳеч қачон.
Минг авраманг, тушунтирманг,
Оёқ тирар у чунон…
Сиз “ёғли” деб айтган ишнинг,
Хушламайди ёғини.
Шундан жиғи-бийрон ота,
Айтар кўнгил доғини…
Уйлантириш ҳаракати,
Зое кетар кўпинча…
Ўғлингизга қиз изламанг,
Кутинг ўзи топгунча!
Болам қандоқ яшаркин, деб,
Юрак сиқиб, ўйламанг.
Қийинчилик кўрмасин, деб,
Ўзингизни қийнаманг…
Ташлаб қўйинг ўз ҳолига,
Ташландиққа тегмас тош.
Кўзим мошдек очилди-да,
Урилганда тошга бош…
* * *
Ўйлаб кўрсам, отам менга
Китоб ўқи, демаган.
Ўйламаган ким бўлишим,
Асло ғамим емаган…
Орзуларнинг оғушида,
Ёнишимга кулганди.
Унга қандоқ эришмоғим,
Демак, яхши билганди!
* * *
Ўғлингизга омад тиланг,
Сиқиб қўйинг қўлини.
Майли, чигал бу ҳаётда,
Ўзи топсин йўлини.

Тўлқин ЭШБЕК
2017 йил

Скачать видео